Leizaran Eskubaloiak antolatutako gizonezkoen txapelketak 18 talde eta haur, kadete, gazte eta senior mailetako 250 jokalari baino gehiago bildu zituen larunbatean
Leizaran Eskubaloiak antolatutako denboraldiaurreko mutilen XV. Eskubaloi Txapelketa ospatu zen atzo, larunbata, irailak 12, Andoainen. Infantil, kadete, jubenil eta senior mailetako 18 talde eta 250 jokalari baino gehiago elkartu ziren Allurralde kiroldegian eta Arrate frontoian.
Burlatak, Eguesek, Saiekok, Urolak eta Txingudik, Leizarango talde ezberdinez gain, eskubaloiaz gozatzeko aukera eman zuen jardunaldian parte hartu zuten, eta giro ona izan zen bai pistetan eta baita harmailetan ere. Eguneko lehen zatian kanporaketa fase ezberdinak jokatu ziren, Allurralde kiroldegia bete zuten final batzuei bide eman aurretik eta azken segundoetara arte berdintasunak eta emozioak markatu zuten.
Infatil mailan, Leizaran Urdina nagusitu zen, berdintasun handiko finalean Egues mendean hartuta. Norgehiagoka azken txanpara iritsi zen dena erabakitzeke zegoela, eta etxekoen falta jaurtiketa bat falta zenean, Lander Arrietek erantzukizuna bere gain hartu zuen eta garaipena eman zion jaurtiketa Leizarani 14-13ko emaitzarekin.
Kadete mailako finalean Leizaran Construcciones Camacho eta Egues izan ziren aurrez aurre, emozioa azken unera arte mantenduz. Etxekoek gol bateko abantailarekin ekin zioten azken minutuari (23-22), baina Eguesek zazpi metroko jaurtiketa izan zuen azken segundoetan partida berdintzeko. Leizaranen atezainak penaltia gelditu zuen eta etxekoen garaipena eta jardunaldiko bigarren titulua ziurtatu zuen talde andoaindarrarentzat.
Jubenil mailan, Burlata izan zen garaile Txingudi 22-20 gaindituta. Bi taldeek maila handiko finala eskaini zuten, joko azkarrarekin, intentsitatearekin eta kalitatezko ekintzekin markagailua azkenera arte irekita mantendu zutelarik. Azkenean, talde nafarrak garaipena lortu zuen eta txapelketako txapeldunen koadroa osatu zuen.
Eva Gutierrez Leizaran Eskubaloiko presidenteak, Andoni Alvarez Andoaingo alkateak eta Iosu Mateo zinegotziak hartu zuten sariak banatzeko ardura.
Sari banaketaren ondoren, Javier Zeramikak eta Burlata buru zuten taldeek egunari amaiera bikaina eman zion lagunarteko partida jokatu zuten. Bi taldeen esperientziak, intentsitateak eta joko onak ikuskizun polita eskaini zieten Allurraldera gerturatu zirenei. Markagailua etxekoen aldekoa izan zen (27-17), baina norgehiagokak iraun zuen 60 minutuetan borrokatu behar izan zuten.
Leizaran Eskubaloiak bereziki azpimarratu nahi izan du boluntario guztien lana, posible egin baitzuten jardunaldia aurrera eramatea, arbitraje eta koordinazio lanetatik hasi eta txapelketa aurrera ateratzeko beharrezkoak ziren antolakuntza lan ezberdinetaraino.
Peña Santa Krutz elkartearen laguntza ere eskertu du klubak, parte-hartzaileen bazkaria prestatzeko instalazioak utzi baitzituen, baita Andoaingo Udalaren eta enpresa babesleen babesa ere: Javier Zeramikak, Otordu, Aspilla, Lixoné, Ernio Inmobiliaria, Camacho Construcción, Urrats, Kaiku, Insalus eta Pasquier. Haien laguntza ezinbestekoa da horrelako ekimenak antolatu ahal izateko.
Txapelketa honekin, Leizaran Eskubaloiak hasiera ematen dio 2026/2027 denboraldiari, eta klubak lanean jarraituko du Andoainen eskubaloiaren praktika bultzatu eta sendotzeko.
Hurrengo hitzordua Allurralden irailaren 18an, ostiralan, 19:00etan izango da, denboraldi honetan Leizaran Eskubaloia ordezkatuko duten talde guztien aurkezpenarekin. Asteburuan hasiko dira, gainera, ligako norgehiagokak klubeko talde gehienentzat.